Напярэдадні заканчэння навучальнага года і з мэтай прафілактыкі дзіцячага дарожна-транспартнага траўматызму з 25 мая па 5 чэрвеня ў рэспубліцы пройдзе спецыяльнае комплекснае мерапрыемства МУС «Увага - дзеці!».
У сярэднім 80% непаўналетніх атрымліваюць траўмы на дарогах у цёплы час года, з мая па кастрычнік, большая іх частка - летам, калі дзеці застаюцца без нагляду педагогаў і бацькоў.
У гэтыя дні для прыцягнення ўвагі дзяцей і ўсіх удзельнікаў дарожнага руху вадзіцелі абавязаны рухацца ў светлы час сутак з уключаным блізкім святлом фар або дзённымі хадавымі агнямі.
Супрацоўнікі міліцыі, педагогі і бацькі аб'яднаюць свае намаганні па забеспячэнні бяспекі юных удзельнікаў дарожнага руху. Запланаваны шэраг мерапрыемстваў для дзяцей і падлеткаў.
Асаблівая ўвага будзе засяроджана на правядзенні прафілактычнай работы з бацькамі. Міліцыянеры растлумачаць прычыны і наступствы ДТЗ з удзелам дзяцей, нагадаюць аб правілах бяспечнай перавозкі непаўналетніх, адказнасці за парушэнні ПДР, а таксама неабходнасці асабістага прыкладу правільных і бяспечных паводзін на дарозе.
АДАІ Капыльскага РАУС