Папулярнасць квадракоптараў і рознага роду дронаў працягвае расці. Гэтыя апараты становяцца ўсё больш даступнымі, а вобласць іх прымянення ўсё больш пашыраецца. Фотаздымка, лагістыка, відэаманіторынг – квадракоптары выкарыстоўваюць як для працы так і для забавы. Аднак не многія ведаюць, што законам устаноўлены правілы выкарыстання гэтых апаратаў, а таксама адказнасць за іх.
Для беспілотных лятальных апаратаў, прадугледжаны асаблівы парадак выканання палётаў, які цягне за сабой дазвольны прынцып выкарыстання паветранай прасторы Рэспублікі Беларусь з дапамогай падачы заяўкі ў адпаведныя органы адзінай сістэмы арганізацыі паветранага руху Рэспублікі Беларусь на выкарыстанне такой прасторы. Да карыстальнiка БЛА па заканадаўстве нашай краіны прад'яўляецца шэраг патрабаванняў. Напрыклад, выкарыстоўваць іх на вышыні, якая не перавышае 100 метраў ад узроўню зямной (воднай) паверхні. Нельга ўжываць у межах зон, забароненых для выкарыстання БЛА, без узгаднення з дзяржаўнымі органамі або арганізацыямі, у інтарэсах якіх устаноўлены такія зоны. Пунктам 103 авіяцыйных правілаў палётаў у паветранай прасторы Рэспублікі Беларусь палёты беспілотных лятальных апаратаў над населенымі пунктамі, за выключэннем сельскіх, забаронены. Акрамя гэтага, неабходна нанесці маркіроўку з указаннем прозвішча, імя, імя па бацьку, а таксама адраса месца жыхарства фізічнай асобы, ІП ці назвы юрыдычнай асобы і яго месцазнаходжання. Маркіроўка наносіцца на бачнай частцы авіямадэлі (масай больш за 0,5 кг) або на яе схаваных частках, да якіх магчымы доступ без выкарыстання інструментаў. Маркіроўка павінна быць пераборлівая і ўстойлівая да атмасферных ападкаў. Уся гэта інфармацыя змяшчаецца ў Правілах выкарыстання авіямадэляў у Рэспубліцы Беларусь, зацверджаных пастановай Савета Міністраў ад 16.08.2016 № 636.
Для выкарыстання квадракоптара пры аэрафотаздымцы абавязковай умовай з'яўляецца наяўнасць у карыстальніка паветранай прасторы дазволу Генеральнага штаба Узброеных Сіл. Атрымаць такі дазвол можна бясплатна і ў кароткія тэрміны падаўшы заяву на правядзенне аэрафотаздымкі ў электронным выглядзе праз электронную пошту.
Палёт без дазволу на выкарыстанне паветранай прасторы аператарам БЛА ўтварае склад адміністрацыйнага правапарушэння, прадугледжанага арт. 18.35 КоАП Рэспублікі Беларусь (парушэнне правілаў выкарыстання паветранай прасторы альбо правілаў выкарыстання авіямадэляў) і цягне накладанне штрафу ў памеры да дваццаці базавых велічынь, а на юрыдычную асобу – да пяцідзесяці базавых велічынь.
Акрамя таго, на тэрыторыі Рэспублікі Беларусь рэгіструюцца выпадкі асляплення з зямлі крыніцамі лазернага выпраменьвання экіпажаў паветраных суднаў грамадзянскай авіяцыі. Як правіла, названыя падзеі адбываюцца ў вячэрні час і могуць прывесці не толькі да часовай або поўнай страты зроку пілотаў, але і як следства – да катастрофы паветраных судоў, у тым ліку да пагрозы жыццю і здароўю грамадзян. Звычайна дадзеныя дзеянні ў дачыненні да паветраных судоў здзяйсняюцца з выкарыстаннем лазерных указак, якія можна набыць у вольным продажы ў гандлёвай сетцы.
У адпаведнасці з Крымінальным кодэксам Рэспублікі Беларусь падобныя дзеянні ўтрымліваюць прыкметы арт. 147 КК Рэспублікі Беларусь (наўмыснае прычыненне цяжкага цялеснага пашкоджання) караецца абмежаваннем волі на тэрмін ад 3 да 5 гадоў або пазбаўленнем волі на тэрмін ад 4 да 8 гадоў, арт. 309 КК Рэспублікі Беларусь (наўмыснае прывядзенне ў непрыдатнасць транспартнага сродку або шляхоў зносін) караецца штрафам або арыштам, або абмежаваннем волі на тэрмін да трох гадоў, або пазбаўленнем волі на той жа тэрмін, арт. 339 КК Рэспублікі Беларусь (хуліганства) караецца грамадскімі працамі, або штрафам, або папраўчымі работамі на тэрмін да двух гадоў, або арыштам, або пазбаўленнем волі на тэрмін да двух гадоў.
Старшы інспектар па РР ААПІП Капыльскага РАУС маёр міліцыі А.А. Сяргеева
Крыніца «СП»
