Гэты навучальны год для гімназіі №1 стаў плённым, і прыклад таму - вынікі ЦЭ. На гэты раз лідзіруючую пазіцыю па вучэбным прадмеце «хімія» заняла Вікторыя Бабарэка.
Дзяўчына доўга рыхтавалася да цэнтралізаванага іспыту, ёй дапамагалі настаўнікi Таццяна Уладзіміраўна Івановіч і Галіна Сцяпанаўна Дамашэвіч.
— Было складана, але я справілася, — дзеліцца Вікторыя. - Будучым выпускнікам хачу пажадаць: калі ўжо выбралі які-небудзь прадмет, аддавайце ўсе свае сілы і веды на яго вывучэнне, старанна паўтарайце матэрыялы, вучыце формулы, а на экзамене не спяшайцеся і будзьце ўважлівымі, думайце - і ў вас усё атрымаецца.
— Каб вучні палюбiлі адзін са складаных прадметаў, важна самому любіць яго, — гаворыць Таццяна Івановіч. — Каб у дзяцей з'явілася матывацыя, важна заўсёды ставіць на занятках практычныя і лабараторныя доследы, прымяняць актыўныя інфармацыйныя тэхналогіі, якія, дарэчы, заўсёды вітаюцца дзецьмі.
З сёмага класа выпускнік СШ №2 г. Капыля Аляксей Мельнікаў палюбіў гэты прадмет нароўні з біялогіяй. З 10 класа абраў профіль па хіміі і стаў вывучаць яе паглыблена. Свой прафесійны шлях хлопец вырашыў звязаць з медыцынай. І не дзіўна, бо ў сям'і - цэлая дынастыя ўрачоў. Аляксей удзячны настаўнікам, якія ўнеслі вялікі ўклад і дапамаглі здабыць шмат каштоўных ведаў па прадмеце. Гэта Соф'я Уладзіміраўна Захарык, Ала Васільеўна Койпіш і Алена Мікалаеўна
- У профільным класе па вучэбным прадмеце «хімія» навучалася пяць вучняў, - кажа Ала Койпіш. - Аляксей мэтанакіравана і з асаблівай цікавасцю займаўся хіміяй. Як настаўніку мне прыемна ўдвая, што на цэнтралізаваным іспыце ў яго самы высокі вынік, а гэта першым чынам доўгая і ўпартая праца над самім сабой і сваімі ведамі. Я ніколькі не сумнявалася, што ў яго будзе такі высокі вынік.
Варта адзначыць, што і Вікторыя, і Аляксей неаднаразова бралі ўдзел у алімпіядах па вучэбным прадмеце «хімія» і станавіліся яе пераможцамі.
Наталля ДАВЫДЗЕНКА. Фота аўтара
Крыніца «СП»