З самай раніцы ў скверы маладых, размешчаным насупраць аддзела загс райвыканкама, шумна. Па ўсім перыметры разышліся хлопцы ў аранжавых камізэльках. Кожны з іх заняты сваёй пэўнай справай: нехта зграбае скошаную траву, нехта ачышчае плітку ад пустазелля, некаторыя прыбіраюць смецце. Акрамя работнікаў Капыльскай ЖКГ, на тэрыторыі працуюць 15 юнакоў і дзяўчат са студэнцкага экалагічнага атрада «Рытм».
Камандзір атрада, педагог дадатковай адукацыі ЦТДіМ Ірына Барсукевіч, адзначыла, што студатрад, сфарміраваны на базе Капыльскай ЖКГ, пачаў сваю працу з 12 чэрвеня і працягнецца да 24 чэрвеня. Рабочы дзень пачынаецца з 8.30 да 13.00 з перапынкам на 10 хвілін кожную гадзіну. Выхадныя, як і належыць, — субота, нядзеля.
- Прыемна адзначыць, што ўсе хлопцы працаздольныя, спагадныя і арганізаваныя, - працягвае Ірына Яўгенаўна. — Многія з іх упэўнены, што, добраўпарадкоўваючы наш утульны мястэчкагорад, мы прыўносім свой уклад у скарбонку добрых спраў раёна. Пагадзіцеся, куды прыемней цёплымі летнімі вечарамі прыйсці адпачыць ці проста прагуляцца па парку, дзе чыста, утульна і камфортна.
Намеснік галоўнага інжынера Валянціна Якаўлева дадала, што працоўны дзень у хлопчыкаў і дзяўчынак пачынаецца з інструктажу па тэхніцы бяспекі, які праводзіць іх куратар — інжынер па добраўпарадкаванні і азеляненні тэрыторый домаўладанняў Генадзь Зубік. Выдаюцца сродкі індывідуальнай абароны, вада, пальчаткі, спецвопратка, сродкі гігіены.
- Ёсць пэўны пералік работ, які можна выконваць падлеткам з 14 гадоў, - кажа Валянціна Уладзіміраўна. — За гэты перыяд студатрадаўцам трэба будзе зрабіць уборку прыдамавых тэрыторый, паркаў і сквераў. Падмясці тратуарныя дарожкі, ачысціць плітку ад пустазелля. У цяпліцах высадзіць кветкі ў кантэйнеры, а таксама падрыхтаваць зямлю да наступнай пасадкі раслін, і, вядома ж, паліваць іх.
— У склад нашага атрада ўвайшлі 7 хлопцаў і 8 дзяўчат, — гаворыць навучэнка гімназіі №1 г. Капыля Кацярына Карповіч. — Мы з энтузіязмам прыступілі да працы. Пасля працоўнага дня няма асаблівай стомленасці. Часам нават хочацца нешта зрабіць яшчэ. Прыемныя моманты: зносіны з сябрамі, ну і, вядома ж, заробак. Бо ў мяне на яго планы: хачу зрабіць прыемны сюрпрыз дарагому мне чалавеку.
Наталля ДАВЫДЗЕНКА
Фота аўтара
Крыніца «СП»