Каля помніка воінам-вызваліцелям сабраліся прадстаўнікі раённай улады, працоўных калектываў прадпрыемстваў і ўстаноў, раённых грамадскіх арганізацый і мясцовыя жыхары, каб ушанаваць памяць тых, хто прайшоў праз суровыя гады Вялікай Айчыннай вайны, хто заваяваў свабоду коштам уласнага жыцця.
Пра тое, што нямецка-фашысцкія захопнікі напалі на Савецкі Саюз, жыхары Капыля даведаліся ў першы ж дзень вайны з выступлення народнага камісара замежных спраў У.М. Молатава. І ўжо 27 чэрвеня на вуліцах Капыля з'явіліся першыя часткі захопнікаў. Рабочыя, калгаснікі, інтэлігенцыя з першых дзён акупацыі ўключыліся ў актыўную барацьбу з ненавісным ворагам. У ноч з 3 на 4 ліпеня 1941 года каля вёскі Старыца прайшоў бой часцей Чырвонай Арміі з нямецка-фашысцкімі захопнікамі. Чырвонаармейцы знішчылі чатыры варожыя танкі і шмат іншай тэхнікі. Выключны гераізм праявілі байцы 287-га артпалка пад камандаваннем лейтэнанта І.М. Усцінава. Сёння ў аг. Старыца на месцы бою ўзвышаецца помнік 183 воінам, што загінулі ў гэтым баі, а на кургане стаіць гаўбіца, як напамін аб мужнасці і доблесці нашых салдат.
Адкрываючы мітынг-рэквіем, старшыня райвыканкама Сяргей Пілішчык адзначыў, што нашы дзяды ішлі ў бой з марай аб мірнай, шчаслівай будучыні для сваіх дзяцей і ўнукаў, для ўсіх, хто жыве на зямлі.
— І мы павінны выканаць іх мару - працаваць на стварэнне, рабіць жыццё лепшым, берагчы мір і выхоўваць у дзяцей і моладзі пачуццё грамадзянскасці і патрыятызму, - падкрэсліў кіраўнік раёна. - Гэта неабходна ўжо для таго, каб упэўнена глядзець у будучыню, каб ведаць, у імя чаго і дзякуючы каму мы жывем.
— Сёння мы бачым, што міжнароднай супольнасцю прымаюцца беспрэцэдэнтныя спробы перапісаць нашу гісторыю, аспрэчыць суверэнітэт і незалежнасць Рэспублікі Беларусь, рэабілітаваць фашызм і нацызм, з якімі на працягу доўгіх гадоў так доблесна змагаліся нашы дзяды і прадзеды, — зазначыў у прывітальным слове пракурор Капыльскага раёна Арцём Ляўша. — Расследаванне генацыду беларускага народа ў гады Вялікай Айчыннай вайны з'яўляецца данінай памяці загінуўшым і садзейнічае ўстанаўленню і захаванню гістарычнай справядлівасці, служыць рэалізацыі антыфашысцкага прынцыпу: «Ніколі больш!»
Пасля хвіліны маўчання ў знак памяці і агульнага смутку аб загінуўшых да Вечнага агню і падножжа помніка ўсклалі вянкі, яркім покрывам ляглі жывыя кветкі.
Таццяна Бохан
Фота аўтара
крыніца «СП»
