Спажыванне непаўналетнімі алкаголю (алкагольных, слабаалкагольных напояў ці піва) з'яўляецца адным з найбольш распаўсюджаных відаў рызыкі ў падлеткавым узросце, цягне за сабой негатыўныя медыцынскія, псіхалагічныя і сацыяльныя наступствы, уключаючы пагаршэнне здароўя, развіццё захворванняў, змяненне паводзін, парушэнне фарміравання асобы, сацыяльных навыкаў, асацыяльны лад жыцця, адставанне ў вучобе, учыненне правапарушэнняў, атручэнні, траўматызм, няшчасныя выпадкі.
Алкаголь валодае таксічным (атрутным) і псіхаактыўным (наркатычным) дзеяннем.
Пад уплывам таксічнага дзеяння алкаголю могуць развівацца захворванні нервовай сістэмы (галаўнога мозгу), печані, сардэчна-сасудзістыя і іншыя захворванні. Спажыванне алкаголю можа быць прычынай атручэнняў, у тым ліку смяротных.
Нават калі ў непаўналетніх, якія спажываюць алкаголь, «цяжкія» захворванні, выкліканыя спажываннем алкаголю, не разаўюцца ў падлеткавым узросце, і не ва ўсіх выпадках такія захворванні з'явяцца ў сталым узросце, шкода ад спажывання алкаголю здароўю непаўналетніх наносіцца ў любым выпадку.
Асаблівасцю арганізма непаўналетняга з'яўляецца тое, што ён усё яшчэ знаходзіцца на этапе развіцця. Алкаголь, з'яўляючыся таксічным рэчывам, парушае «нармальны» працэс развіцця арганізма дзіцяці. І парушэнні працэсу развіцця арганізма дзіцяці тым істотней, чым меншы ўзрост пачатку спажывання алкаголю, большая колькасць (доза), канцэнтрацыя («градус»), частата спажывання алкаголю.
Найбольш схільны да негатыўнага ўплыву алкаголю галаўны мозг дзіцяці. У працэсе развіцця галаўнога мозгу ўстанаўліваюцца працяглыя сувязі паміж нервовымі клеткамі. Алкаголь, з'яўляючыся таксічным рэчывам, парушае гэтыя сувязі. Надыходзіць затрымка развіцця мыслення, асобы, не рэалізуецца закладзены патэнцыял. Найбольш уразлівы перыяд для галаўнога мозгу ад дзеяння алкаголю - гэта перыяд развіцця галаўнога мозгу, які працягваецца да 21 года.
У перыяд актыўнага развіцця нервовай сістэмы галаўны мозг таксама больш уразлівы ў плане прывыкання да алкаголю. Працэс алкагалізацыі ў моладзі, асабліва жаночага полу, развіваецца значна хутчэй, чым у дарослых і мужчын, і па наступствах значна цяжэй. Чым раней непаўналетні пачынае спажываць алкаголь, тым хутчэй развіваюцца працэс алкагалізацыі, большая верагоднасць развіцця парушэнняў у дарослым узросце.
Несфармаваны арганізм падлетка вельмі хутка прывыкае да алкаголю. Таму існуе высокая рызыка таго, што падлетак можа заахвоціцца да алкаголю, калі ён п'е нават слабыя алкагольныя напоі. Небяспека ўзмацняецца яшчэ і легкадумным стаўленнем да алкаголю. Але рызыка негатыўных наступстваў існуе, нават калі непаўналетні вып'е невялікую колькасць алкаголю.
Таксама ўсталявана сувязь паміж ужываннем алкаголю ў раннія падлеткавыя гады і шкоднымі сацыяльнымі і паводніцкімі праявамі ў падлеткавым і сталым жыцці. Чым раней падлетак пачынае ўжываць алкаголь, тым цяжэй наступствы.
За кансультатыўнай дапамогай і лячэннем грамадзяне, якія спажываюць алкаголь, наркотыкі ці іншыя псіхаактыўныя рэчывы, могуць звяртацца (у тым ліку ананімна) у наркалагічны кабінет установы аховы здароўя па месцы жыхарства або ва ўстанову аховы здароўя «Мінскі абласны клінічны цэнтр «Псіхіятрыя-наркалогія» (г. Мінск, вул. П. Броўкі, 7; сайт: www.mokc.by; запіс на прыём праводзіцца па тэлефонах: +375-17-311-00-99,
+375-29-899-04-01, +375-29-101-73-73).
Установа аховы здароўя
«Мінскі абласны клінічны
цэнтр «Псіхіятрыя-наркалогія»
Крыніца «СП»
