На полi недалёка ад вёскі Рымашы роўнымі радамі выстраена сельскагаспадарчая тэхніка, якая ўдзельнічае ва ўборачнай кампаніі. Асаблівую ўвагу прыцягваюць велічныя камбайны — у большасці сваёй беларускія «Палессе», але ёсць таксама імпартныя «Нью Холанд». На сталах каля імправізаванай сцэны - духмяныя караваі і снапы, звязаныя з каласоў. Над саспелай нівай разносіцца музыка, а кветкі ў руках дзяцей здаюцца ярчэй чым звычайна.
Павіншаваць лясноўскіх аграрыяў з пачаткам самай важнай сельскагаспадарчай кампаніі прыехалі старшыня райвыканкама Сяргей Пілішчык і генеральны дырэктар ААТ «Гарадзейскі цукровы камбінат» Генадзь Салавей. Яны звярнуліся да сельгасвытворцаў са шчырымі, цёплымі пажаданнямі плённай працы, добрага ўраджаю, спрыяльнага надвор'я і дастойнага хлебнага каравая.
— Гэты год для нас — дастаткова складаны, нядаўняя засуха вельмі моцна паўплывала на збожжавыя культуры, — зазначыў дырэктар УП «ПIК-Лясное» Леанід Буцевіч. - Але, нягледзячы на ўсе цяжкасці, упэўнены, што гэта выпрабаванне на трываласць, як і ўсе папярэднія, мы пройдзем годна. Памятайце, што адзін работнік на вёсцы дае некалькі працоўных месцаў у горадзе. Менавіта вы сваёй штодзённай працай забяспечваеце харчовую бяспеку краіны. Як прыступаць да добрай справы без божага блаславення? Таму настаяцель Свята-Троіцкай царквы ў в. Цялядавічы Генадзь Корнеў па традыцыі прачытаў малітву і акрапіў святой вадой сельскагаспадарчую тэхніку.
Вядома, выканалі і іншыя традыцыі: падарылі ганаровым гасцям свята і камбайнерам духмяныя караваі са збожжа леташняга ўраджаю, затым жанчыны з сярпамі сжалі першы сноп, які ва ўрачыстай абстаноўцы ўручылі гаспадару свята Леаніду Буцевічу.
Было месца і звонкім песням, і запальным танцам. Але толькі ў гэты дзень. Бо наперадзе ўсіх удзельнікаў сёлетняга жніва чакаюць цяжкія будні. Ім трэба будзе прыбраць усё да апошняга зярнятка, імкнучыся зрабіць гэта якасна і без страт. І, вядома, хочацца пажадаць удалай гарачай пары і спрыяльнага надвор'я. - Экіпажы, па машынах! — вось нарэшце дырэктар гаспадаркі Леанід Буцевіч дае старт жніву.
Заракаталі магутныя маторы, адзін за адным камбайны крануліся ў поле. Зусім хутка іх жаткі апусцяцца ў шумлівыя каласы, а зерне залатым дажджом пасыплецца ў бункеры.
Крысціна ЖАГОЛЬ. Фота аўтара
Крыніца «СП»