Інфармацыя прадастаўлена Капыльскім РК прафсаюза работнікаў АПК па стане на 31 ліпеня 2023 года.
Першым у раёне тысячны рубеж пераадолеў камбайнавы экіпаж Віталія Лобана і Дзмітрыя Бабені з ААТ «Капыльскае». У абсалютных лідэрах яны застаюцца і сёння, на іх рахунку - 1202 тоны збожжа. Працуюць аграрыі на збожжаўборачнай машыне «Лексіён».
Трымаюць марку і камбайнеры-тысячнікі з ААТ «Семежава». На камбайне КЗС-1218 1040 тон намалаціў экіпаж у складзе Аляксандра і Таццяны Додзь, 1018 тон — на рахунку Васілія Пілата і Валерыя Русака.
Два экіпажы-тысячнікі з'явіліся і ў філіяле «Лакнея». Адзін з іх - Алег і Дзмітрый Майсюк, якія намалацілі 1023 тоны. На перадавых радках раённага спаборніцтва таксама экіпаж у складзе Генадзя Кавалені і Валерыя Кавалені (1009 т). Лакнееўскія аграрыі працуюць на імпартных «New Holland». Літаральна два дзясяткі тон да тысячнай мяжы засталося экіпажу ў складзе Аляксандра і Таццяны Нераненя, якія працуюць у гэтай жа гаспадарцы.
Сярод кіроўцаў-тысячнікаў лідэрства ўтрымлівае Іван Галубовіч з ААТ «Капыльскае». На аўтамабілі МАЗ ён перавёз 1584 т. Вадзіцель з філіяла «Лакнея» Валерый Дзямідчык на збожжаток даставіў 1255 т збожжа. Замыкае тройку лідэраў Мікалай Маркоўскі з ААТ «Ціміразеўскі», на яго рахунку - 1100 т.
Аляксандр Кароль з ААТ «Капыльскае» перавёз 1068 т, а Павел Рудзеня з ААТ «Прэснакі» — 1020 т. Яшчэ адзін вадзіцель, які пераадолеў тысячны рубеж — Дзмітрый Каваленка з ААТ «Піянер-Агра». Крыху больш за 935 тон даставіў на збожжаток Фёдар Шкуцько з ААТ «Семежава». Паказчыкі Віктара Дзямідчыка з філіяла «Лакнея» таксама высокія, на яго рахунку 867 тон перавезенага збожжа.
Крысціна ЖОГАЛЬ
