Распавядаючы пра «Kopyl-Race», вядучы спецыяліст Беларускай федэрацыі лёгкай атлетыкі Сяргей Зыкаў адзначыў, што трэйлавая гонка будзе цікавай і істотна насычанай эмоцыямі.
— Сёлета ў Капылі пройдуць юбілейныя - 25 па ліку спаборніцтвы, - адзначае Сяргей Аляксандравіч. - Для арганізатараў галоўнае - унесці ў іх нешта новае. Прадугледжана больш раллі (арыентыровачна каля двух кіламетраў) - адных толькі снапоў з сенам на раллі будзе 15 штук, дадалі гразевых і водных перашкод. Ускладніць трасу і кукурузнае поле, дзе будзе ўзараная свежая разора. Замыкае - вельмі крутая гара: прадугледжаны два ўздымы пры дапамозе вяроўкі і на карачках. Далёка не адзін бег чакае ўдзельнікаў: ім трэба будзе пераадолець шчыты, кантоўку шын, перанос на выцягнутых руках 10-кілаграмовых мяшкоў з пяском, вялікіх бетонных шароў па 12 кг і г.д. Летась мы ўвялі агнявую перашкоду, якая знайшла станоўчы водгук ва ўдзельнікаў спаборніцтваў, таму ў гэтым сезоне пастараемся крыху яе ўскладніць. Па просьбе спартсменаў палепшылі і дзіцячыя забегі. Акрамя традыцыйных перашкод для дзятвы ўвялі кантоўку шын і перацягванне мяшка з пяском. Разыначкай свята ў гэты дзень ізноў стануць дзіцячы забег на дыстанцыі 400 м і сямейны - на 1 км. Выпрабуй сябе і ты!
Таццяна Бохан
Крыніца «СП»
