Як часта вы задумваецеся, наведваючы грамадскія месцы, дзе знаходзяцца эвакуацыйныя выхады і куды вы накіруецеся ў выпадку пажару? Добра, калі на гэты аб'ект вы прыходзіце не ў першы раз і хоць трохі арыентуецеся, але і гэта не дае поўнай гарантыі, што вы не разгубіцеся ў выпадку надзвычайнай сітуацыі. А калі вы несяце адказнасць не толькі за сябе, але і за іншых людзей? Каб быць упэўненым у сваіх дзеяннях, не паддавацца паніцы, трэба ведаць правільны алгарытм дзеянняў.
У Адзіны дзень бяспекі кіраўнікі аб'ектаў арганізуюць практычную адпрацоўку планаў эвакуацыі. Як і куды правільна рухацца, на якія знакі арыентавацца, каб застацца ў жывых пры пажары і іншых НС, як правільна карыстацца першаснымі сродкамі пажаратушэння і аказаць першую дапамогу – жыхары раёна змогуць даведацца не толькі ў тэорыі, але і на практыцы.
21.09.2023 у 16.00 каля ДУК «Капыльскі раённы цэнтр культуры» будзе арганізавана тэматычная пляцоўка па навучанні насельніцтва дзеянням ва ўмовах пажараў і іншых надзвычайных сітуацый.
На свяце будзе арганізаваны цэлы шэраг ужо ўпадабаных гульнявых пляцовак, на якіх госці змогуць вывучыць алгарытм выкліку службы выратавання, правілы карыстання рознымі сродкамі пажаратушэння, аказання першай дапамогі.
І дарослыя, і дзеці даведаюцца якіх правілаў неабходна прытрымлівацца, каб пры пажары не пацярпець і хутка пакінуць месца здарэння, па якіх тэлефонах тэлефанаваць ратавальнікам і якую інфармацыю неабходна паведаміць.
Запрашаем усіх далучыцца да мерапрыемстваў у рамках Адзінага дня бяспекі, разам з ратавальнікамі праверыць свае веды ў галіне бяспекі і замацаваць іх, каб пры рэальнай НС не разгубіцца, выратаваць сваё жыццё і дапамагчы таму, хто побач.