Што рабіць у выпадку надзвычайнага здарэння? Куды тэлефанаваць і каго клікаць на дапамогу? Пра гэта і многае іншае школьнікам малодшых класаў расказалі ратавальнікі, медыкі і супрацоўнікі газавай службы падчас Адзінага дня бяспекі, які сёння праходзіць па ўсёй краіне.
На пляцоўцы каля раённага цэнтра культуры разгарнуліся тэматычныя пляцоўкі, дзе хлопцы маглі атрымаць інфармацыю аб дзеяннях у выпадку надзвычайнага здарэння і паглядзець, якое абсталяванне ратавальнікі бяруць з сабой, калі прыходзяць да нас на дапамогу.
— Такія мерапрыемствы мы праводзім для таго, каб у чарговы раз акцэнтаваць увагу на важнасці ўменняў і навыкаў паводзін у надзвычайных сітуацыях, навучыць тых, хто раней не надаваў значэння гэтаму пытанню і нагадаць аб тым, што ў сілах і магчымасцях кожнага звесці да мінімуму трагічныя выпадкі. А веданне, як вядома, - гэта сіла, - адзначыла спецыяліст сектара прапаганды і ўзаемадзеяння з грамадскасцю Капыльскага РАНС Марыя Дзічкоўская.
Навучальныя тэматычныя плошчы выклікалі ў школьнікаў непадробную цікавасць. Нехта з хлопцаў спрабаваў рэанімаваць манекен, нехта вывучаў змесціва машыны аварыйнай газавай службы і спецтэхнікі МНС. Спецыялісты навучалі, расказвалі і нагадвалі юным жыхарамі раёна аб правілах пажарнай, электра-, цеплабяспекі, бяспекі пры карыстанні газам у побыце, якую небяспеку нясе ў сабе ўгарны газ, аб неабходнасці быць асцярожнымі на дарозе, законапаслухмянымі ў жыцці і шматлікім іншым.
З дзецьмі правялі віктарыны, арганізавалі гульні і конкурсы. Вядома, не абышлося і без прызоў. Самыя актыўныя, уважлівыя і эрудзіраваныя ўдзельнікі свята ўзнагароджаны падарункамі - размалёўкамі і пазламі. Атрымалі юнакі і наглядна-выяўленчую прадукцыю на тэму бяспекі жыццядзейнасці.
Крысціна ЖОГАЛЬ
Фота аўтара
«СП»
