З году ў год падобнае мерапрыемства карыстаецца папулярнасцю. Што нядзіўна, бо гэта тэма ніколі не губляе сваёй актуальнасці.
У Рэспубліцы Беларусь вялікая ўвага надаецца розным формам працы з насельніцтвам. Адным з напрамкаў з'яўляецца разгляд зваротаў грамадзян і юрыдычных асоб, які ажыццяўляецца, у першую чаргу, у адпаведнасці з Канстытуцыяй Рэспублікі Беларусь.
— Да таго ж, стан працы са зваротамі з'яўляецца адным з асноўных крытэрыяў ацэнкі дзейнасці дзяржаўных органаў і арганізацый. І ад таго, як будзе выбудавана праца з людзьмі, залежыць стаўленне да ўлады. У гэтым пытанні няма дробязяў, - на гэтым акцэнтавала ўвагу кіраўнік спраў Капыльскага райвыканкама Ірына Пабока падчас адкрыцця семінара.
Адзначым, што арганізатарамі вучобы выступілі Мінская абласная арганізацыйная структура Беларускага таварыства «Веды» і Капыльскі райвыканкам. На семінар запрошаны спецыялісты прадпрыемстваў і арганізацый, якія адказваюць за работу са зваротамі грамадзян.
Асноўным спікерам мерапрыемства стала загадчык сектара прававога забеспячэння сацыяльна-эканамічнага развіцця Цэнтра дзяржаўнага будаўніцтва і права ДНУ «Інстытут эканомікі Нацыянальнай акадэміі навук Беларусі» Антаніна Трыпузава. Былі закрануты новаўвядзенні ў заканадаўстве, а таксама праблемныя пытанні, якія ўзнікаюць у практыцы. Расказаны асноўныя прынцыпы, парадак і тэрміны разгляду зваротаў. Удзельнікі семінара даведаліся пра тыповыя парушэнні і недахопы пры разглядзе зваротаў. Антаніна Трыпузава таксама патлумачыла, якая адказнасць надыходзіць за парушэнне заканадаўства ў дадзеным пытанні.
— На ўсе ўзнікшыя пытанні ўдзельнікам семінара дадзены дэталёвыя вычарпальныя адказы, што дазволіла слухачам павысіць свае веды ў частцы работы са зваротамі грамадзян і юрыдычных асоб, — адзначыла загадчык сектара па рабоце са зваротамі грамадзян і юрыдычных асоб райвыканкама Наталля Язвінская.
Карысць ад мерапрыемства відавочная, прысутныя абменьваліся меркаваннямі і ўласным вопытам.
— Без сумневу, гэта тэма сёння вельмі актуальная, — адзначыла адна з удзельніц семінара, інспектар па кадрах рэдакцыі газеты «Слава працы» Кацярына Кандратовіч. - Лічу, што аналагічныя семінары неабходна праводзіць і ў будучыні, бо гэта дапамагае актуалізаваць веды ў пэўных пытаннях, кампенсаваць прабелы ў ведах, калі яны ёсць. Да таго ж, заўсёды можна задаць канкрэтныя пытанні кампетэнтнаму спікеру. На іх дадуць вычарпальныя адказы. Добра і тое, што навучанне праходзіла з выкарыстаннем мультымедыйнага экрана, што дапамагло лепш засвоіць навучальны матэрыял.
Крысціна ЖОГАЛЬ
«СП»
