Пра тое, як праца ў лясной гаспадарцы стала сапраўдным прызваннем, галоўны інжынер Капыльскага вопытнага лясгаса Сяргей Яўсючэня распавёў у інтэрв'ю «СП».
ШЛЯХ
— Адкуль узялася мара звязаць сваё жыццё з лясной гаспадаркай?
— З першых дзён з'яўлення на свет мяне акружалі непаўторныя па прыгажосці мясціны, якімі ў нас на Капыльшчыне славіцца вёска Смолічы. Любіў гэту ранішнюю свежасць і прахалоду ў лесе, якія заўсёды надавалі асаблівы настрой. Пасля заканчэння школы загадзя для сябе вызначыў, што будучыню сваю звяжу абавязкова з жыццём лесу. Даўняя мара прывяла ў Полацкі дзяржаўны лясны каледж, а затым - у Беларускі дзяржаўны тэхналагічны ўніверсітэт. З нецярпеннем заўсёды чакаў чарговыя заняткі, адкрываючы для сябе свет прыроды і знаходзячы сваё месца як спецыяліста ў гэтым свеце.
Заўсёды хацелася пасля вучобы застацца жыць і працаваць на малой радзіме. Так і атрымалася: прыйшоў у лясгас маладым спецыялістам у 2011 годзе. Пачынаў з майстра лесу, памочніка ляснічага, а затым - і ляснічага, а галоўным інжынерам працую ўжо крыху больш за пяць гадоў. Лясная сфера такая дзіўная і цікавая: кожны дзень даведваешся нешта новае, развіваешся ў прафесіі і час ад часу павышаеш кваліфікацыю. Дарэчы, два гады таму прайшоў навучанне ў Акадэміі кіравання пры Прэзідэнце Беларусі.
СПРАВА
— Што самае каштоўнае вы вынеслі з конкурсу «Малады лідэр Міншчыны»?
— Я рады, што стаў часткай каманды Капыльскага вопытнага лясгаса, дзе падабраліся працавітыя людзі, цалкам аддадзеныя абранай прафесіі. У конкурсе я выступіў з праектам «Санкцыі = новыя магчымасці». Паколькі работа з насельніцтвам заўсёды стаяла ў прыярытэце ў кіраўніцтва нашага лясгаса, то для прасоўвання прадукцыі і пашырэння рынкаў збыту былі адкрыты дзве гандлёвыя пляцоўкі: у Дзяржынску і на Лагойскім тракце ў Мінску. Нашы піламатэрыялы і тавары ўласнай вытворчасці пад брэндам «Лясны домік» па прымальных цэнах прыйшліся даспадобы пакупнікам.
Вядома, кожны ўдзельнік конкурсу выклаўся на ўсе сто і дакладна даказаў, што варты звання сапраўднага лідэра. Упэўнены, што шлях лідэра - гэта доўгая і старанная праца над сабой. Важна памятаць, што лідарамі не нараджаюцца, імі становяцца! Таму я ні ў якім разе не збіраюся спыняцца на дасягнутым. Наперадзе — сотні планаў, задумак, праектаў, якія ўнясуць уклад у развіццё нашага прадпрыемства.
Сяргей Барысавіч — мэтанакіраваны, валявы, адукаваны і працавіты супрацоўнік, з якім заўсёды камфортна працаваць, — так характарызуе галоўнага інжынера намеснік кіраўніка арганізацыі па ідэалагічнай рабоце Капыльскага вопытнага лясгаса Таццяна Канаплянік. - Яго адрозніваюць высокі прафесіяналізм, кампетэнтнасць, узаемапавага пры вырашэнні вытворчых пытанняў. Як вынік - заслугі Сяргея Барысавіча ў рабоце лясной галіны неаднаразова былі адзначаны на абласным і раённым узроўнях.
ЖЫЦЦЁ
— На пытанне «Як жыццё?» што звычайна адказваеце?
- Выдатна! Я па-філасофску стаўлюся да жыцця — калі мае родныя, блізкія і сябры здаровыя, то я шчаслівы. Імкнуся быць сумленным і справядлівым у адносінах да навакольных і ў адносінах да самога сябе, рэальна сябе ацэньваць, не перабольшваючы свае магчымасці. Трэба быць адкрытым свету - так прасцей жыць, тады і свет адкрыты табе.
ХАРАКТАР
- Вялікі дзеяч Філіп Чэстэрфілд пісаў, што ўсе людзі судзяць пра нас па нашай знешнасці і манерах і толькі нешматлікія - па нашых душэўных якасцях. Кажу пра гэта таму, што хачу ведаць: Вы чалавек з характарам?
- Так. Я заўсёды маю сваё меркаванне, стараюся выказваць сваю пазіцыю, але гэта не перашкаджае мне чуць меркаванне іншых. Калі казаць пра праявы майго характару як лідэра, то скажу так: усё жыццё маё — і ў юнацтве, і ў студэнцкія гады — фармавалі паводзіны. І тым не менш я не вазьму на сябе смеласць сказаць, што ў мяне ёсць імкненне да перамогі, смеласць, рашучасць — няхай гэта пацвердзяць тыя, хто мяне акружае, з кім я працую, хто ведае мае справы, мае ўчынкі.
СЯМ'Я
- Шчасце - гэта мець вялікую, любячую, клапатлівую, дружную сям'ю. Дапоўніце, калі ласка, самі сэнс гэтай мудрай думкі…
— Сям'я наша дружная, гэта мая надзея і апора. Разам з жонкай Вікторыяй мы адзіныя і непадзельныя, такі цэласны арганізм, які не можа існаваць па іншых правілах. Дарэчы, яна таксама працуе ў Капыльскім вопытным лясгасе спецыялістам па маркетынгу.
Сам я са шматдзетнай сям'і: бацькі акружылі нас клопатам і ўвагай, прышчапілі асноўныя каштоўнасці — згуртаванасць і працавітасць. Іх урокі не прайшлі дарма, і я перанёс жыццёвыя прынцыпы і правілы ў дарослае жыццё.
Як сапраўдны мужчына, паставіў перад сабой сапраўдную мэту: пабудаваць цёплую хату, абавязкова з альтанкай і лазняй, стварыць такую ж моцную сям'ю, у якой рос сам. Жонку шукаў пад стаць сабе. Сёння ў нас падрастаюць васьмігадовы Павел і чатырохгадовая Ганна. З жонкай да іх выхавання ставімся сур'ёзна, клапоцімся пра іх духоўнае, маральнае і фізічнае выхаванне.
Усе цяжкія жыццёвыя сітуацыі вырашаем разам, сумесна знаходзім мудрае і правільнае рашэнне ўзнікшай праблемы. Агульнымі захапленнямі з'яўляюцца спорт, сумесныя паездкі і вандраванні.
ПАРАДА
— Што б вы хацелі параіць зусім маладым пачынаючым свой працоўны шлях спецыялістам?
— Па-першае, не баяцца цяжкасцей і смела ісці наперад. Заўсёды ёсць магчымасць дасягнуць вышынь, было б толькі жаданне! Не варта забываць і аб тым, што на прафесійным шляху не павінна быць абыякавасці да таго, што робіш. Бо калі чалавек гарыць за справу і перажывае за вынік, то поспех не прымусіць сябе доўга чакаць.
Гаварыла Таццяна БОХАН
Фота аўтара
«СП»
