Няма нічога даражэй увагі да праблем іншых, падтрымкі ў цяжкай сітуацыі — па такім прынцыпе працуе аддзяленне сацыяльнай рэабілітацыі, абілітацыі інвалідаў, забеспячэння дзённага знаходжання для грамадзян пажылога ўзросту Капыльскага ТЦСАН. Сёння яго наведваюць 19 маладых людзей з абмежаванымі магчымасцямі. Яны не сядзяць склаўшы рукі: рэгулярна ўдзельнічаюць у розных мерапрыемствах, прымаюць удзел у выставах і падарожнічаюць. Дарэчы, сёлета ўжо наведалі аграсядзібу «Слуцкі страус» і Дом перніка ў Мінску. Абедзве экскурсіі былі насычаны сюрпрызамі і ўражаннямі. Пазнавальнай стала таксама экскурсія ў раённы краязнаўчы музей, падчас якой маладыя людзі даведаліся пра гісторыю развіцця Капыльскага рэгіёну.
Асаблівы акцэнт спецыялісты цэнтра робяць на бяспецы жыццядзейнасці: у рамках правядзення месячніка бяспекі дарожнага руху прайшоў майстар-клас на тэму «Стань прыкметней у цемры».
Вельмі папулярныя сярод «асаблівых» людзей заняткі фізічнай актыўнасцю. Яны спрыяюць адпачынку, забавам, зносінам, падтрыманню або набыццю добрай фізічнай формы. Таму моладзь з асаблівымі патрэбамі з задавальненнем прыняла ўдзел у спартландыі, якая праходзіла на базе Капыльскага ЦКРНіР у рамках праграмы міжведамаснага ўзаемадзеяння. Падчас праходжання заданняў хлопцы паказалі выдатны вынік і спартыўную кемлівасць. Перамагла дружба: кожны ўдзельнік спаборніцтва атрымаў медаль і пазітыўны настрой.
Маладыя людзі з інваліднасцю таксама поўныя ідэй і натхнення. І гэтыя якасці яны прадэманстравалі падчас правядзення дня адчыненых дзвярэй «Свет пачынаецца з цябе» для выхаванцаў ЦКРНіР. Быў арганізаваны майстар-клас па працоўнай тэрапіі: маладыя людзі, якія наведваюць аддзяленне дзённага знаходжання ТЦСАН, навучылі рабят як правільна чаранкаваць герані. Пасля ўсе разам актыўна ўключыліся ў спартыўна-гульнявую праграму, якая была арганізавана на свежым паветры. Завяршылася мерапрыемства сяброўскім чаяваннем.
Не менш цікавым стаў і спартыўны турнір па футболе, які прайшоў на базе Капыльскага РФАЦа.
Што ж, застаецца толькі парадавацца, што ў нашым горадзе ёсць такая сацыяльная ўстанова, дзе хлопцы і дзяўчаты з асаблівасцямі ў развіцці маюць магчымасць мець зносіны, навучацца неабходным навыкам, каб весці камфортнае і годнае жыццё.
Таццяна БОХАН
«СП»