У Белавежскую пушчу на свята запрасілі дзяўчынак і хлапчукоў з усёй Беларусі, а таксама ганаровых гасцей.
— Дабрачынная акцыя «Нашы дзеці» крочыць па краіне больш за 25 гадоў і праводзіцца па ініцыятыве Прэзідэнта Беларусі Аляксандра Лукашэнкі, — зазначыў віцэ-прэм'ер краіны Ігар Петрышэнка. — У рэспубліцы шмат зроблена для таго, каб дзяцінства ў хлопцаў было шчаслівым. Напярэдадні Новага года мы чакаем не толькі падарункаў - спадзяемся на цуд. І кожны з нас здзяйсняе гэты цуд у школе, на працы - на сваім месцы. У добры шлях, акцыя «Нашы дзеці»! Марафон дабра працягваецца…
Мінская вобласць на сувязь з Белавежскай пушчай выйшла з Дзяржынска, дзе акцыя «Нашы дзеці» пачалася інклюзіўным дабрачынным фестывалем «Запалі сваю зорку». На яго запрасілі больш за 300 таленавітых хлопчыкаў і дзяўчынак з абмежаванымі магчымасцямі з усіх раёнаў вобласці.
У Доме культуры Дзяржынска адкрылася выстава-прэзентацыя дэкаратыўна-прыкладной творчасці. Кожны ўдзельнік за свае працы атрымаў дыпломы і падарункі ад Мінскага аблвыканкама. Шчаслівая дзятва, для якой стварылі святочную атмасферу, яшчэ падчас гулянняў ля навагодняй ёлкі з заміраннем сэрца сачыла за прамым уключэннем з Белавежскай пушчы, адкуль да іх звярнуўся са словамі віншаванняў галоўны Дзед Мароз краіны.
У другой частцы фестывалю на сцэне бліскалі вакалісты і танцоры, музыканты і тэатралы з ліку дзяцей з абмежаванымі магчымасцямі. Для ўсіх гэтых хлопчыкаў і дзяўчынак таксама падрыхтавалі падарункі, у тым ліку ад грамадскіх аб'яднанняў цэнтральнага рэгіёну, якія вырашылі падтрымаць юныя таленты.
Адкрыў гала-канцэрт намеснік старшыні Мінаблвыканкама Іван Маркевіч, які ўрачыста аб'явіў аб старце акцыі ў Цэнтральным рэгіёне:
— Хачу сказаць дзякуй усім, хто арганізоўваў сённяшняе мерапрыемства. Тое, што гэта свята дасць старт акцыі на цэлы месяц наперад, вельмі шмат што значыць. У нашай краіне надаецца асаблівая ўвага маладзёжнай палітыцы. І нашы дзеці гэтага заслугоўваюць. Жадаю вам сёння адчуць святочную атмасферу і навагодні настрой!
Удзел у інклюзіўным фестывалі прынялі і прадстаўнікі Капыльшчыны. У Дзяржынск адправіліся начальнік упраўлення па адукацыі, спорце і турызме райвыканкама Алена Карповіч, дырэктар цэнтра карэкцыйна-развіваючага навучання і рэабілітацыі Капыльскага раёна Ірына Гарэльская разам з выхаванцамі ЦКРНіР.
Адначасова з усёй рэспублікай да дабрачыннай акцыі падключыліся і ў нашым раёне. Каля галоўнай гарадской ёлкі сабраліся хлопцы са школ горада і дашкольных устаноў. Разам з Дзедам Марозам і Снягуркай яны вадзілі карагоды, гулялі ў гульні і каталіся на ватрушках.
— Хлопцы, вы чакаеце чараўніцтва? А ведаеце, якое свята будзе зусім хутка? —з прывітальным словам да маленькіх гасцей звярнулася намеснік старшыні райвыканкама Ірына Юхо. — Гэту акцыю мы праводзім для таго, каб ніводны маленькі грамадзянін нашай краіны не застаўся без увагі падчас навагодніх святаў і ўсеагульнай весялосці. Няхай усё, што вы задумалі, абавязкова спраўдзіцца. Дасягайце ў новым надыходзячым годзе вышынь у вучобе, спорце і творчасці.
Работнікі Цэнтра творчасці дзяцей і моладзі Капыльскага раёна і Капыльскага РАНС падрыхтавалі для дзяўчынак і хлапчукоў некалькі забаўляльных лакацый. Рабяты разам з аніматарамі весела танчылі пад запальныя навагоднія кампазіцыі, а пасля ў гульнявой форме вывучалі пажарную бяспеку. Увогуле, сумаваць ім сёння відавочна не даводзілася, а ўсеагульная весялосць і забіяцкі смех рабят прыцягвалі ўвагу ўсіх мінакоў.
Нагадаем, што ў рамках дабрачыннай акцыі «Нашы дзеці» ў раёне пройдуць навагоднія ранішнікі, святы для адораных дзяцей, віншаванні дзяцей, якія апынуліся ў цяжкай жыццёвай сітуацыі і шмат іншых мерапрыемстваў.
Крысціна ЖОГАЛЬ
«СП»
