У акцыі прынялі ўдзел абласныя арганізацыі, структурныя падраздзяленні Мінскага аблвыканкама, абласное аб'яднанне прафсаюзаў, у тым ліку галіновыя прафсаюзныя арганізацыі вобласці, кіраўніцтва Капыльшчыны і раённыя грамадскія аб'яднанні.
У нашым раёне эстафета дабра дайшла да выхаванцаў дзіцячых дамоў сямейнага тыпу Таццяны Каленчыц і Наталлі Максімчык, у якіх выхоўваецца дзевяць і чацвёра дзяцей адпаведна.
Танцы, конкурсы, загадкі і вершы з казачнымі персанажамі і галоўнымі героямі навагодніх святаў Дзедам Марозам і Снягуркай, а таксама салодкія пачастункі і каштоўныя падарункі - усё гэта стварыла прыемную атмасферу ўрачыстасці. Кампутар, лыжы, сэндвічніца, вафельніца, сертыфікат на суму 2500 руб. і многае іншае. Ад незлічонай колькасці падарункаў у хлопцаў разбягаліся вочы, а ўсмешкі на іх тварах не знікалі. Захапленню не было мяжы. Менавіта па гэтыя добрыя і шчырыя эмоцыі прыехалі госці. Віншаванні выхаванцы прымалі ад прадстаўнікоў Мінскай абласной арганізацыі Беларускага прафсаюза работнікаў аховы здароўя, Беларусбанка, аблспажыўсаюза, Мінаблсельбуда, Беларускай чыгункі і іншых.
Хлопцы ў адказ частавалі ўдзельнікаў дабрачыннай акцыі гасцінцамі, прыгатаванымі разам з бацькамі-выхавальнікамі.
Старшыня Мінскай абласной арганізацыі Беларускага прафесійнага саюза работнікаў адукацыі і навукі Таццяна Апраніч адзначыла, што дабрачынная акцыя адчыніла дзверы ў свет чараўніцтва і цудаў, у якім выконваюцца жаданні. Бо надыходзячы Новы год абавязкова прынясе радасць, новыя ўражанні, надзеі і аптымізм. І каб у гэтыя святочныя дні кожны здабыў сваё ўласнае шчасце, сямейную згоду і хатнюю ўтульнасць.
Неад'емнай часткай урачыстасці стаў абмен цацкамі. Так, хлопчыкі і дзяўчынкі дзіцячых дамоў сямейнага тыпу Капыльшчыны перадалі навагоднія ўпрыгожанні, вырабленыя сваімі рукамі, у абмен на сімвал абласной акцыі. Дарэчы, усе дзіцячыя вырабы можна будзе ўбачыць на абласным мерапрыемстве, якое ўжо ў гэтыя выхадныя (23 снежня) будзе праходзіць у Слуцку з удзелам усіх задзейнічаных у акцыі «Адзіная Міншчына - сэрца Беларусі».
Варта адзначыць, што сёлета прадстаўнікі дабрачыннай акцыі наведалі шэсць сацыяльных устаноў, размешчаных у Капыльскім, Дзяржынскім, Барысаўскім і Слуцкім раёнах, у якіх выхоўваецца больш за 80 дзяцей.
У гэты дзень супрацоўнікі Капыльскага РЦК і рэдакцыі «Слава працы» таксама пераўвасобіліся ў любімых казачных герояў, якія стваралі чароўную атмасферу.
Наталля ДАВЫДЗЕНКА
Фота аўтара
«СП»
