Павіншаваць дзяцей з надыходзячымі святамі прыйшлі пракурор Капыльскага раёна Віталь Афанасенка і намеснік начальніка ўпраўлення па адукацыі, спорце і турызме Капыльскага райвыканкама Святлана Сташаніна.
На парозе дома гасцей сустрэла ветлая гаспадыня Кацярына Фёдараўна. Яна гасцінна запрасіла ўвайсці ў дом, правяла ўсіх у прасторны, чысты пакой, дзе з непадробнай цікавасцю і шчырымі ўсмешкамі чакалі прыходу гасцей Уладзіслаў, Максім і Вадзім.
Першай справай Віталь Міхайлавіч і Святлана Іванаўна павіншавалі хлопчыкаў і дзяўчынак з надыходзячымі святамі і ўручылі ім падарункі і салодкія пачастункі.
- Дзеці - гэта самае дарагое, што ў нас ёсць. Таму штогод напярэдадні Новага года мы стараемся парадаваць дзяцей, якія асабліва маюць патрэбу ў цяпле, увазе і клопаце, падарыць ім крыху чараўніцтва — адзначыла Святлана Сташаніна.
—Напярэдадні навагодніх святаў хацелася не проста парадаваць дзяцей прысмакамі і падарункамі, а падарыць сапраўдную атмасферу свята. Пажадаць ім у новым годзе моцнага здароўя, поспехаў, плённай вучобы, ажыццяўлення ўсіх жаданняў, - падкрэсліў Віталь Афанасенка.
Хлопцы былі вельмі рады гасцям і падарункам. Яны з задавальненнем паразмаўлялі з пракурорам нашага раёна. У сяброўскай абстаноўцы хлапчукі расказалі пра вучобу, захапленні, поспехі і дасягненні, падзяліліся планамі на будучыню і згулялі ў аэрахакей.
- Усе мы вельмі любім гуляць у футбол. Летам ганяем мяч на школьным стадыёне, а зімой - у зале, - адзначыў Улад.
- Дома хлапчукі гуляюць у настольны футбол, які яны купілі сабе самі. Убачылі ў нейкім мультфільме і назапасілі неабходную суму, - з гонарам дзеліцца Кацярына Мірная. - Мы стараемся навучыць рабят правільна абыходзіцца з грашыма.
— Нам вельмі падабаецца страляць з пнеўматычнай вінтоўкі, гэтаму нас вучаць у школе. І кнігі мы любім чытаць, - дадаюць хлапчукі. А яшчэ хлопцы з усёй сур'ёзнасцю думаюць аб тым, каб звязаць сваё жыццё з войскам.
Было сказана шмат добрых слоў у адрас прыёмнай сям'і, прысутныя шчыра захапіліся іх ветлівасцю і гасціннасцю. У слове ў адказ гаспадары дома падзякавалі ўсім за навагодні сюрпрыз, падарункі і прыемныя віншаванні. Муж і жонка Мірныя пажадалі гасцям моцнага здароўя і поспехаў у наступным годзе, а хлопцы з радасцю ўручылі падарункі ў адказ — хатнія салодкія пачастункі.
Таццяна ЗАХАРЭВІЧ
Фота аўтара
«СП»
