Дыплом пераможцы алімпіяды дае права быць залічаным ва ўніверсітэт без уступных іспытаў. А гэта значыць, што Данііл ужо можа лічыць сябе студэнтам названай ВНУ. Каб дасягнуць такога выніку, юнак працаваў не адзін год. Цягам некалькіх гадоў ён станавіўся ўдзельнікам першага, другога і трэцяга этапаў рэспубліканскай алімпіяды па біялогіі. А ў 9 класе заваяваў Дыплом ІІІ ступені на трэцім (абласным) этапе.
- Яшчэ ў 9 класе вызначыўся з выбарам будучай прафесіі, хацеў стаць урачом, - распавядае Данііл. - А калі даведаўся, што ў гродзенскім універсітэце будзе праходзіць шматпрофільная алімпіяда, вырашыў прыняць удзел і паспрабаваць свае сілы. Вядома, вельмі хваляваўся, калі выконваў заданні алімпіяды, асабліва на заключным вочным этапе.
Ці разлічваў на перамогу? Цяжка сказаць. За спіной - не адзін год падрыхтоўкі, дзесяткі праштудзіраваных энцыклапедый і дапаможнікаў, неаднаразовы ўдзел у рэспубліканскай алімпіядзе па біялогіі. Часам мне здавалася, што сярод такой вялікай колькасці ўдзельнікаў з усёй Беларусі абавязкова знойдзецца той, хто рыхтаваўся лепш за мяне. Вынікаў я чакаў з нецярпеннем, і спачатку неяк не паверыў сваім вачам. Вельмі прыемна, калі ўсе твае намаганні годна ацэньваюцца.
Радасна і тое, што я апраўдаў надзеі сваіх настаўнікаў біялогіі, якія адыгралі важную ролю ў маім лёсе. Цікавасць да прадмета падтрымліваў Мікалай Паўлавіч Стульба, а потым, пасля выбару профілю навучання, сапраўднай настаўніцай стала Святлана Максімаўна Булат. Вялікі дзякуй і выдатнаму дасведчанаму педагогу Вользе Іванаўне Сыман. У тандэме з імі я дасягнуў сур'ёзных вынікаў у вучобе. Вельмі ўдзячны роднай гімназіі за гады цікавай вучобы, моцныя веды, з прычыны чаго я атрымаў шанец стаць студэнтам без уступных іспытаў!
Надзейным тылам для мяне з'яўляюцца і мае родныя - бацькі і бабуля. Гэта яны прывілі мне цікавасць да навучання, любоў да роднай зямлі і прыроды. Яны заўсёды верылі ў мяне і мае сілы, а гэта і ёсць аснова любой перамогі.
Фота гімназіі № 1 г. Капыля
Аўтар: Дыяна Ткачэнка
«СП»
