- Будаўніцтва жылля - значная падзея ў засваенні любога мікрараёна. Любая новая кватэра - гэта своеасаблівы рухавік прагрэсу. Апроч узвядзення жылой забудовы, добраўпарадкоўваюцца тэрыторыі, з'яўляюцца дзіцячыя пляцоўкі і стаянкі. Упэўнены, што гэтыя ўмовы пражывання будуць адпавядаць усім тым патрабаванням, якія прад'яўляюцца да якаснага і камфартабельнага сучаснага жылля, - адзначыў кіраўнік раёна.
Агульная плошча жылога дома складае крыху больш за 880 квадратаў, на якіх умясціліся 12 аднапакаёвых і 6 двухпакаёвых кватэр, а таксама камфартабельны пад'езд з прасторнымі пляцоўкамі.
Уладальнікамі запаветных квадратных метраў сталі сем'і, адселеныя з аварыйнага жылля, а таксама частка кватэр прадугледжана як арэнднае жыллё для спецыялістаў філіяла «Лакнея», ААТ «Піянер-Агра», Капыльскага доследнага лясгаса, райаграсэрвісу і Капыльскага ф-ла ААТ «Слуцкі сыраробны камбінат».
Варта адзначыць, што гэты шматкватэрны дом з'яўляецца адзіным у раёне, дзе для мэт ацяплення, гарачага водазабеспячэння і прыгатавання ежы выкарыстоўваецца электрычная энергія. У кожнай з кватэр прадугледжана электраабсталяванне, таму ўключаць і рэгуляваць тэмпературу жыхары змогуць самі.
Сімвалічна, што ўвядзенне новых квадратных метраў адбылося ў перыяд электаральнай кампаніі.
Ці задаволеныя новымі кватэрамі самі жыхары? Пытаемся ў іх. Сваімі ўражаннямі дзеліцца ўладальніца «двушкі» Вера Абабурко. Менавіта ёй падчас урачыстага адкрыцця ўручылі сімвалічны залаты ключ ад новага дома.
- Нас перасялілі з аварыйнага двухпавярховага дома па вуліцы Мінскай. Вядома, гэта ашаламляльныя змены. Цяпер мы жывем у камфортных умовах, з добрым і свежым рамонтам. Таму ад імя ўсіх жыхароў, пераселеных з аварыйнага жылля, дзякуем за магчымасць атрымаць новае жыллё, - адзначыла Вера Аляксандраўна.
З задавальненнем абжывае новы дом шматдзетная сям'я Фурык.
- У мяне трое дзяцей, Вікторыя, Валісіса і Ксенія. Як шматдзетная сям'я мы атрымалі двухпакаёвую кватэру. Новае жыллё - гэта, вядома, ні з чым не параўнальна. Мы ўжо паспелі крыху абжыцца, усё падабаецца. Тут больш квадратных метраў, чым у нашай мінулай кватэры, якую я атрымлівала як сірата. Зручныя і прасторныя пляцоўкі ў пад'ездзе, прадугледжана месца для размяшчэння веласіпедаў, санак і іншых дзіцячых транспартных сродкаў. А мне як маме траіх дзяцей гэта асабліва важна, - распавядае Святлана Фурык.
Выдатна добраўпарадкавана тэрыторыя і вакол дома. Побач з'явіліся акуратныя дарожкі і стаянка для аўтамабіляў, якая здольна забяспечыць патрэбу ў парковачных месцах усіх жыхароў. А вось гульнявы комплекс заслугоўвае асобнай увагі. Тут хлопцам будзе сапраўды цікава. І бяспечна - пляцоўка мае мяккае прагумаванае пакрыццё. Варта адзначыць і адмысловы экстэр'ер будынка. Цікавыя сцены ў выглядзе трыкутніка вылучаюць яго сярод іншых дамоў нашага горада.
Фота аўтара
Аўтар: Крысціна Жогаль
«СП»
