У апошні час пачасціліся выпадкі ўчынення крадзяжоў і ашуканскіх дзеянняў у адносінах да пажылых грамадзян.
Каментуе першы намеснік начальніка аддзела ўнутраных спраў Капыльскага райвыканкама падпалкоўнік міліцыі Дзмітрый Ліпніцкі:
— Як правіла, злачынцы пад падставай продажу (куплі) розных тавараў, рэчаў і прадуктаў харчавання, прадстаўляючыся работнікамі службы сацыяльнай абароны насельніцтва, медыцынскімі работнікамі і іншымі асобамі, пранікаюць у жыллё адзінокіх пенсіянераў, дзе, скарыстаўшыся іх даверлівасцю, здзяйсняюць крадзеж грошай, залатых вырабаў і іншых дробнагабарытных каштоўных рэчаў. Часцяком пажылыя грамадзяне як найбольш уразлівая катэгорыя нашага насельніцтва ў большай меры схільныя да злачыннага замаху з боку зламыснікаў у сферы камп’ютарных тэхналогій.
Для таго каб не стаць ахвярай ашуканцаў, неабходна выконваць наступныя правілы засцярогі: заўсёды правяраць атрыманую інфармацыю; ні пры якіх абставінах не паведамляць, у тым ліку праз сетку інтэрнэт і мабільнай сувязі, свае персанальныя даныя (коды, рэквізіты банкаўскіх карт, нумар пашпарта, лагіны і паролі доступу); не перадаваць трэцім асобам сваю банкаўскую карту, сотавы тэлефон; пры паступленні званкоў ад асоб, якія прадстаўляюцца супрацоўнікамі банка, памятаць, што работнік банка ніколі не спытае вашыя персанальныя звесткі аб карце.
