На гэты раз віншаванні і падарункі атрымала шматдзетная сям’я Анастасіі Стрэлкінай з аг. Цімкавічы. Ва ўрачыстай абстаноўцы Віталь Міхайлавіч павіншаваў дзяцей з паспяховым заканчэннем навучальнага года. Ён уручыў ім цацкі, набытыя за кошт сродкаў работнікаў пракуратуры, і пажадаў далейшых поспехаў у вучобе і творчай дзейнасці. Асаблівая ўвага ў размове была ўдзелена бяспецы: пракурор нагадаў дзецям аб неабходнасці выконваць правілы паводзін у летні перыяд.
Не паспелі госці развітацца, як дзеці ўжо з захапленнем зрывалі падарункавае пакаванне. У іх поглядах чыталіся непадробная радасць і шчырая падзяка. Асабліва натхнёны быў Багдан, які з усмешкай падзякаваў: «Дзякуй за падарункі!» Гэта найлепшае пацверджанне, што чужых дзяцей не бывае, і заўсёды знойдуцца тыя, хто гатовы дапамагчы.
— Шчыра хочацца, каб як мага больш людзей адкрывалі свае сэрцы для добрых спраў і далучаліся да дабрачынных ініцыятыў, — падзяліўся Віталь Афанасенка. — І гэта не проста словы. Кожнае дзіця павінна адчуваць, што яно не адно, што дарослы свет — гэта свет падтрымкі і абароны. Наш прамы абавязак — быць побач з дзецьмі, дапамагаць ім расці і надзейна засцерагаць іх дзяцінства. Толькі так мы зможам выгадаваць здаровае і шчаслівае пакаленне.
Аўтар: Таццяна Бохан
«СП»
