Асаблівыя словы падзякі і каштоўныя падарункі сёння атрымалі тыя, хто сваёй працай набліжае агульны бохан.
Галоўным героем дня стаў вадзіцель Аляксандр Кароль, які першым у раёне перавёз ад камбайнаў больш за 3000 тон збожжа. Сярод механізатараў безумоўнымі лідэрамі стаў экіпаж у складзе Віталя Лобана і Сяргея Гарашчэні, якія намалацілі 2000 тон збожжа і гэта таксама лепшы паказчык у раёне сёння.
Акрамя гэтага, па тысячы тон перавезлі вадзіцелі Рэнат Скрыцкі і Юрый Додзь. Столькі ж намалацілі механізатары: бацька і сын Дылеўскія, Аляксандр Чаюк і Аляксей Крывецкі.
Лідэраў жніва павіншавалі першы намеснік старшыні — начальнік упраўлення па сельскай гаспадарцы і харчаванні Капыльскага райвыканкама Віталь Ракевіч, старшыня раённай арганізацыі прафсаюза работнікаў АПК Ірына Сцяпура і дырэктар ААТ «Капыльскае» Сяргей Мацюшэнка.
Звяртаючыся да перадавікоў, Віталь Ракевіч адзначыў не толькі асабістыя рэкорды, але і агульны ўклад калектыву ў поспехі ўсяго рэгіёна.
— Сёння мы ўшаноўваем першага ў раёне трохтысячніка — кіроўцы Аляксандра Караля, а таксама першы экіпаж-двухтысячнік — Віталя Лобана і Сяргея Гарашчэню. Гэтыя паказчыкі заканамерны вынік прафесіяналізму і адказных адносін да справы. Варта адзначыць, што Капыльскі раён займае трэцяе месца ў Мінскай вобласці па валавым намалоце: сабрана больш за 100 тысяч тон збожжа. Ваш уклад у гэты вынік значны. У цэлым па вобласці намалочана больш за 1 мільён тон, і ў спаборніцтве 22 раёнаў Міншчыны мы ўпэўнена трымаемся ў тройцы лідэраў — разам з Нясвіжскім і Слуцкім раёнамі.
Ад раённай улады і прафсаюзнай арганізацыі перадавікі атрымалі падзячныя пісьмы, Ганаровыя граматы, грашовыя прэміі і памятныя падарункі.
Жніво працягваецца, і ў капыльскіх хлебаробаў ёсць усе шанцы не толькі ўтрымаць, але і палепшыць свае пазіцыі ў абласным рэйтынгу.
