У жыхара аг. Мажа спектр пытанняў - жыццёвы: рамонт дваровай тэрыторыі па вул. Сонечнай, адсутнасць вулічнага асвятлення ў аграгарадку і раскладу на аўтобусным прыпынку, аптымізацыя транспартных зносін у ранішні час паміж Капылём і Мажай. Разабрацца з пытаннямі заяўніка даручана адпаведным службам. Акрамя гэтага, мужчына звярнуўся з нагоды неправамерных дзеянняў (на яго думку) супрацоўнікаў РАУС па адносінах да заяўніка.
- Па законе такое рашэнне можна абскардзіць толькі ў пракуратуры або ў судзе — падкрэсліў кіраўнік раёна. - У нашу кампетэнцыю не ўваходзіць вырашэнне пытанняў, якія павінны разглядацца ў парадку крымінальнага, грамадзянскага або гаспадарчага судаводства і парадку, вызначаным Працэсуальна-выканаўчым кодэксам аб адміністрацыйных правапарушэннях.
А вось шматдзетны бацька з в. Праснакі звярнуўся па дапамогу ў працаўладкаванні. Перш ён працаваў на Слуцкім воцатным заводзе на пасадзе начальніка аддзела збыту, але кантракт з заяўнікам не падоўжаны. Аб вакансіях, наяўных у раёне, маладому чалавеку распавяла начальнік аддзела занятасці ўпраўлення па працы, занятасці і сацыяльнай абароне райвыканкама Ірына Юхо.
Каменем перапоны ва ўзаемадзеянні КУП «Капыльскае ЖКГ» і заяўніка стала пытанне скасавання дагавора на вываз бытавога смецця. У жанчыны ў аграгарадку Скабін ёсць дом, які застаўся ад бацькоў, у які яна прыязджае толькі на летні сезон, а ўвесь астатні час пражывае ў Гродне. Вось таму і прасіла аказаць садзейнічанне ў скасаванні дагавора. Паколькі зварот патрабуе падрабязнага тлумачэння грамадзянцы, таму адказ будуць даваць загадчык юрыдычным сектарам райвыканкама і дырэктар КУП «Капыльскае ЖКГ».
З нагоды запазычанасці некаторых сельгаспрадпрыемстваў Капыльскага раёна за пастаўленую прадукцыю па доглядзе за раслінамі на прыём звярнуліся прадстаўнікі аднаго з таварыстваў з дадатковай адказнасцю. Пытанне ўзята пад асабісты кантроль кіраўніка раёна.
Таццяна БОХАН
