У будынку Каменскага вучэбна-педагагічнага комплексу дзіцячы сад-сярэдняя школа сабраліся не толькі педагагічныя работнікі, але і неабыякавыя да лёсу роднага аграгарадка мясцовыя жыхары.Бо сустрэчы ў працоўных калектывах, якія рэгулярна праводзяць прадстаўнікі раённай адміністрацыі, - выдатная магчымасць агучыць надзённыя праблемы, а значыць, і вызначыць шляхі іх вырашэння.
Адно з узнятых пытанняў датычылася замены ў аграгарадку электрасетак і асвятлення вуліц у цёмны час сутак. Таксама жыхароў населенага пункта хвалявала праблема прыпыненага працэсу яго газіфікацыі. Прагучала пытанне і аб прывядзенні ў парадак дарогі Стараселле-Праснакі.
«Ці будуць у аграгарадку будавацца новыя дамы?» — агучаны яшчэ адзін напрамак, хвалюючы мясцовых жыхароў.
Праблема незанятасці ў вольны час як дарослых, так і дзяцей таксама хвалявала мясцовых жыхароў: у аграгарадку вось ужо некалькі гадоў зачынены і клуб, і бібліятэка. Раней туды можна было прыйсці, узяць кнігі, пазаймацца ў якіх-небудзь гуртках ды і проста абмеркаваць надзённыя праблемы.
Сяргей Пілішчык і Ірына Кісляк узялі на кантроль названыя пытанні. У сваю чаргу Сяргея Міхайлавіча зацікавіў маральна-псіхалагічны клімат у ААТ «Праснакi» у прыватнасці і Грозаўскага сельсавета ў цэлым.
— У сельгаспрадпрыемстве усё добра, — прагучаў адказ дырэктара Віталя Платуна. - Заработнай платай супрацоўнікі задаволеныя, таму працу шануюць і працуюць на сумленне.
А старшыня названага сельвыканкама Жанна Скрыган дапоўніла, што, нягледзячы на цяжкасці, якія ўзнікаюць, у сельсавеце ўсё ж ствараюцца ўмовы для камфортнага пражывання. Не так даўно ў аграгарадку пабудавана дзіцячая пляцоўка, якая на дадзены момант даволі запатрабаваная.
Дзіяна Ткачэнка