Нацыянальны банк Беларусі падрыхтаваў прапановы па пашырэнні сваіх функцый для падтрымання цэнавай стабільнасці, паведаміў сёння намеснік старшыні праўлення Нацбанка Сяргей Калечыц на сустрэчы з дэпутатамі ў Палаце прадстаўнікоў, перадае карэспандэнт БЕЛТА.
"Нацыянальны банк падрыхтаваў прапановы ў частцы грашова-крэдытнай палітыкі, якія цяпер праходзяць узгадненне з зацікаўленымі дзяржаўнымі органамі. Гэтыя прапановы накіраваны на забеспячэнне неабходных умоў для практычнай рэалізацыі рэжыму інфляцыйнага таргетавання", - расказаў Сяргей Калечыц.
У прыватнасці, прапануецца ўстанаўліваць мэтавы паказчык цэнавай стабільнасці штогод на трохгадовы перыяд у выглядзе дапушчальных межаў яго змяненняў. Пры такім механізме Нацбанк і ўрад штогадова да 1 кастрычніка будуць уносіць мэтавы паказчык па цэнавай стабільнасці на зацвярджэнне Прэзідэнту. "Больш таго, у перспектыве бачыцца мэтазгодным пераходзіць і да прагнозу паказчыкаў сацыяльна-эканамічнага развіцця і бюджэту краіны на такі ж трохгадовы перыяд", - адзначыў Сяргей Калечыц.
Яшчэ адна прапанова датычыцца змянення парадку зацвярджэння Асноўных напрамкаў грашова-крэдытнай палітыкі. Бягучая практыка не дае магчымасці падрабязна апісваць у асноўных напрамках магчымыя дзеянні Нацбанка па выкананні ўскладзеных на яго функцый. Прапануецца замацаваць у заканадаўстве норму аб прадастаўленні праўленню Нацбанка права самастойна прымаць Асноўныя напрамкі грашова-крэдытнай палітыкі на аснове зацверджанага кіраўніком дзяржавы на трохгадовы перыяд мэтавага паказчыка цэнавай стабільнасці.
Паводле ацэнкі Нацбанка, пашырэнне функцый у сферы прагназавання з'яўляецца неабходным элементам рэжыму інфляцыйнага таргетавання, у аснове якога - кіраванне чаканнямі. "Для яго эфектыўнай рэалізацыі Нацыянальны банк павінен мець магчымасць самастойна ажыццяўляць прагноз развіцця эканомікі", - заявіў Сяргей Калечыц.
Разам з тым гэта не азначае адыход ад бягучай практыкі цеснага ўзаемадзеяння з Міністэрствам эканомікі, Міністэрствам фінансаў і іншымі дзяржорганамі пры распрацоўцы прагнозу сацыяльна-эканамічнага развіцця Беларусі на чарговы год - яна захаваецца. "Але для таго, каб падрабязна абгрунтоўваць свае рашэнні і тым самым умацоўваць давер да праводзімай палітыкі, Нацыянальны банк павінен мець магчымасць даводзіць уласныя ацэнкі да ведама эканамічных агентаў. У сувязі з гэтым прапануецца заканадаўча замацаваць магчымасць для Нацбанка ажыццяўляць аналіз і прагноз не толькі тэндэнцый у грашова-крэдытнай сферы, але і ў эканоміцы ў цэлым", - растлумачыў Сяргей Калечыц.
Нараўне з пашырэннем функцый прапануецца ўзмацніць адказнасць старшыні і членаў праўлення Нацбанка за выкананне асноўнай мэты грашова-крэдытнай палітыкі - цэнавай стабільнасці.
"Гэтыя прапановы сфармуляваны на падставе міжнароднага вопыту тых краін, якія дасягнулі значнага поспеху ў забеспячэнні нізкага ўзроўню інфляцыі ў рэжыме інфляцыйнага таргетавання. Спадзяюся, што ўжо хутка, пасля ўзгаднення з усімі зацікаўленымі, гэтыя прапановы паступяць у беларускі парламент", - рэзюмаваў Сяргей Калечыц
Крыніца: belta.by
