Міністэрства эканомікі Беларусі пакуль не бачыць падстаў для перагляду прагнозу ВУП (плануецца на ўзроўні 4 працэнтаў) і іншых макраэканамічных параметраў на 2019 год. Аб гэтым у эфіры тэлеканала "Беларусь 1" заявіў міністр эканомікі Дзмітрый Крутой, паведамляе карэспандэнт БЕЛТА.
Дзмітрый Крутой лічыць, што "да атрымання вынікаў першага паўгоддзя ніякіх падстаў пераглядаць прагноз няма". Улічвацца павінна, напрыклад, сітуацыя ў сельскай гаспадарцы. Эксперты робяць разлікі па магчымым ўраджаі, нарыхтоўцы кармоў. Міністр нагадаў і аб "вядомай гісторыі з бруднай нафтай". Цяпер, паводле яго слоў, робяцца ацэнкі, наколькі паступленне забруджанай нафты ў нафтаправод "Дружба" паўплывае на ўмовы транзіту, гэта значыць на транспартны сектар аптовага гандлю і саміх вытворцаў - НПЗ.
Адказваючы на пытанне аб наступствах расійскага падатковага манеўру ў нафтавай галіне для беларускай эканомікі, Дзмітрый Крутой сказаў, што пры разліку прагнозу 2019 года ў Беларусі свядома не ўлічвалі магчымую кампенсацыю па падатковым манеўры. Такой жа палітыкі плануецца прытрымлівацца і ў 2020 годзе. "Перагаворы з калегамі з Расіі цяпер знаходзяцца ў актыўнай стадыі. Таму, не маючы на руках канчатковых рашэнняў і па нафтавай сферы, і па цане на газ, мы зыходзім з самых песімістычных ацэнак, якія ёсць на сёння. У гэтых умовах мы пакуль не бачым прычын адмаўляцца ад параметраў праграмы сацыяльна-эканамічнага развіцця, якія былі закладзены. Калі нам удасца дамовіцца ў канчатковым выніку з расійскімі калегамі, то гэта стане дадатковым плюсам нашай макраэканамічнай ацэнкі", - адзначыў міністр.
Вяртаючыся да падатковага манеўру, Дзмітрый Крутой звярнуў увагу, што мяркуемая кампенсацыя страт беларускай эканомікі і ў 2019-м, і ў 2020 годзе нязначная ў суадносінах з ВУП, бюджэтам і аб'ёмам экспарту і іншымі ключавымі макраэканамічнымі параметрамі.
Крыніца: belta.by
