ААТ "Полацктранснафта Дружба" пачало прымаць для ААТ "Нафтан" расійскую нафту адпаведнага стандарту, паведамляе БЕЛТА са спасылкай на сайт "Полацктранснафта Дружба".
Згодна з дарожнай картай, брудная нафта з нафтаправода Унеча-Полацк 1 (участак трубаправода "Дружба") выцеснена рэверсам па нафтаправодзе Сургут-Полацк у Расію.
Партыя якаснай нафты разам з раздзяляльным устройствам паступіла на лінейную вытворча-дыспетчарскую станцыю "Полацк" ААТ "Полацктранснафта Дружба" 3 ліпеня.
Гэта нафта адпавядае стандарту, што пацверджана акрэдытаванай лабараторыяй.
З 4 ліпеня па вычышчаным магістральным нафтаправодзе Унеча-Полацк 1 забяспечваецца адгрузка нафты ў ААТ "Нафтан". Пачаліся работы па ачыстцы магістральнага нафтаправода Унеча-Полацк 2.
Як паведамлялася, "Белнафтахім" 19 красавіка заявіў аб рэзкім пагаршэнні якасці расійскай нафты Urals, якая паступае па трубаправодзе "Дружба". Колькасць хлорарганічных злучэнняў у саставе нафты перавышала гранічныя значэнні па стандарце ў дзясяткі разоў. Абодва беларускія нафтаперапрацоўчыя заводы - Мазырскі НПЗ і ААТ "Нафтан" - вымушаны былі знізіць загрузку магутнасцей і панеслі страты.
Выцясненне забруджанай арганічнымі хларыдамі расійскай нафты ў трубаправодзе Унеча-Полацк пачалося 21 чэрвеня. Чакалася, што выцясненне нафты з першай чаргі нафтаправода завершыцца 3 ліпеня, потым пачнецца выцясненне забруджанай сыравіны з другой чаргі нафтаправода Унеча-Полацк, якое прадоўжыцца да канца ліпеня. Завяршальны этап на паўночным напрамку - выцясненне нафты з беларускага ўчастка нафтаправода Сургут-Полацк - прадоўжыцца да 15 жніўня.
Крыніца: belta.by
