Міністр працы і сацыяльнай абароны Ірына Касцевіч сустрэлася з кіраўніком прадстаўніцтва Еўрасаюза ў Беларусі Андрэа Віктарын у сувязі з завяршэннем яе дыпламатычнай місіі. У гутарцы былі агучаны прапановы па прадаўжэнні і паглыбленні супрацоўніцтва ЕС і рэспублікі ў сацыяльна-працоўнай сферы, паведамілі БЕЛТА ў Мінпрацы.
Як адзначыла кіраўнік ведамства, міністэрства плённа супрацоўнічае з ЕС па праектах міжнароднай тэхнічнай дапамогі. І ў гэтым значную ролю адыграла Андрэа Віктарын.
Сярод прыкладаў узаемадзеяння Ірына Касцевіч назвала ўдзел Мінпрацы ў праекце "Занятасць, прафесійная адукацыя і навучанне", накіраваным на пашырэнне перспектыў працаўладкавання моладзі і дарослага насельніцтва праз паляпшэнне ўзаемасувязі паміж прапанаваннем у сферы адукацыі і патрэбнасцямі сучаснага рынку працы. Міністр выказала ўдзячнасць за прадастаўленую па праекце магчымасць вывучэння еўрапейскага вопыту і станоўчых практык па ўдасканаленні нацыянальных сістэм кваліфікацый, распрацоўцы прафесійных рамак кваліфікацый і прафстандартаў. "Атрыманыя веды і вопыт выкарыстаны ў рабоце па ўдасканаленні нацыянальнай сістэмы кваліфікацый", - сказала яна.
Яшчэ адзін важны праект у сферы занятасці, каардынацыю якога забяспечвае Мінпрацы, - гэта "EU4Youth: Развіццё патэнцыялу для працаўладкавання". Яго мэта - павышэнне адукацыйных магчымасцей і патэнцыялу моладзі трох краін: Беларусі, Арменіі і Грузіі. "Гэты праект з'яўляецца добрым укладам, паколькі яго рэалізацыя будзе садзейнічаць вырашэнню актуальнай задачы - павелічэнню колькасці грамадзян, якія маюць запатрабаваныя навыкі для атрымання дастойнай работы і эфектыўнай самазанятасці", - падкрэсліла Ірына Касцевіч.
Па пагадненні з ЕС аб фінансаванні інструмента тэхнічнага супрацоўніцтва міністэрства цесна працавала з АБСЕ па пытаннях гендарнай праблематыкі ў частцы садзейнічання жаночаму лідарству і ўдзелу жанчын у палітычным і грамадскім жыцці. У кастрычніку мінулага года паспяхова праведзены II Міжнародны форум жанчын-лідараў. Чарговае такое мерапрыемства пройдзе і ў бягучым годзе.
Міністр адзначыла ўзаемадзеянне па лініі "Усходняга партнёрства", 10-годдзе якога адзначаецца ў 2019-м. "Мы ўдзячныя за магчымасць удзелу ў мерапрыемствах праекта Еўрапейскага фонду адукацыі "Узгадненне попыту і прапанавання на прафесійныя ўменні ў краінах "Усходняга партнёрства". А таксама ў тэматычных семінарах, дзе вывучаецца вопыт краін ЕС і "Усходняга партнёрства" па пытаннях прагназавання патрэбнасцей у кадрах і ўзгаднення попыту і прапанавання на рынку працы", - растлумачыла Ірына Касцевіч.
Яна выказала надзею на захаванне і прадаўжэнне канструктыўнага ўзаемадзеяння ЕС і Беларусі, у тым ліку па актуальных пытаннях сацыяльна-працоўнай сферы.
На сустрэчы беларускі бок прадставіў прапановы па далейшым супрацоўніцтве. "На наш погляд, перспектыўнымі напрамкамі супрацоўніцтва з'яўляюцца пытанні прагназавання патрэбнасцей рынку працы і развіцця нацыянальнай сістэмы кваліфікацый Рэспублікі Беларусь, падтрымка намаганняў дзяржавы і інстытутаў грамадзянскай супольнасці па рэалізацыі патэнцыялу і задавальненні патрэбнасцей пажылых грамадзян. Міністэрства таксама зацікаўлена ў падтрымцы з боку ЕС у пытаннях укаранення сацыяльных паслуг, што садзейнічаюць сацыялізацыі інвалідаў, і стварэння дамоў для іх самастойнага пражывання", - адзначыла кіраўнік ведамства.
Са свайго боку Андрэа Віктарын выказала ўдзячнасць Міністэрству працы і сацыяльнай абароны за плённую сумесную працу. Яна падтрымала абазначаныя напрамкі супрацоўніцтва і выказала надзею на далейшае ўзаемадзеянне Мінпрацы з прадстаўніцтвам ЕС у Беларусі.
Крыніца: belta.by
