У ходзе рабочай паездкі Андрэй Худык правёў выязную нараду на базе Столінскага раённага выканаўчага камітэта Брэсцкай вобласці па пытанні імпартазамяшчэння глін і каалінаў мясцовымі выкапнямі. У нарадзе прынялі ўдзел старшыня Столінскага райвыканкама Рыгор Пратасавіцкі, прадстаўнікі прыродаахоўнага ведамства і Столінскага райвыканкама, а таксама зацікаўленых прадпрыемстваў - ААТ "Керамін", ААТ "Бярозабудматэрыялы", а таксама ААТ "Гарынскі камбінат будаўнічых матэрыялаў".
"Неабходна разумець, што не радовішчы шукаюць пад існуючую тэхналогію, а пад выяўленыя радовішчы распрацоўваюць тэхналогію абагачэння сыравіны з выкарыстаннем найноўшых дасягненняў навукі. У існуючых санкцыйных умовах арганізацыям - спажыўцам сыравіны неабходна прыняць вычарпальныя меры па гэтым пытанні", - адзначыў міністр.
Ён дадаў, што выкарыстанне тугаплаўкіх глін беларускіх радовішчаў павінна быць павялічана ў неабходных аб'ёмах за кошт удасканалення тэхналогіі іх здабычы і перапрацоўкі, а таксама вызначэння максімальна магчымага напрамку выкарыстання гэтай сыравіны.
У мэтах больш дэталёвага вывучэння сітуацыі на месцы ўдзельнікі выязной нарады наведалі кар'ер па распрацоўцы тугаплаўкіх глін радовішча Гарадное і ААТ "Гарынскі КБМ", размешчаныя ў Столінскім раёне Брэсцкай вобласці.
Усяго ў Беларусі па прамысловых катэгорыях разведана 241 радовішча розных відаў глін, у тым ліку 220 радовішчаў глін і суглінкаў марэнных, азёрна-ледніковых і асадкавых, шэсць радовішчаў тугаплаўкіх глін, 14 радовішчаў глін, якія выкарыстоўваюцца пры вытворчасці цэменту, а таксама адно радовішча глін бентанітавых. Здабычу гліны вядуць 11 арганізацый (арганізацыі, якія ўваходзяць у сістэму Мінбудархітэктуры, камунальнай форм уласнасці і без ведамаснай прыналежнасці). Вядучае месца сярод іх займаюць арганізацыі сістэмы Мінбудархітэктуры (73 працэнты). Напрамкі выкарыстання глін у краіне даволі шырокія - ад выкарыстання пры вытворчасці цэменту да выпуску керамічнай прадукцыі.
Крыніца: belta.by
